Interpol-in Nirav Modi lakah Red Corner Notice a tichhuak

Punjab National Bank kaltlanga sum tam tham tak tichingpentua puh, lunghlua sumdawng lain Nirav Modi-a lakah Interpol chuan Red Corner Notice a tichhuak ta.

Interpol hian Central Bureau of Investigation (CBI) ngenna angin Red Corner Notice hi a tichhuaka ni. Red Corner Notice tihchhuah a nih tak avangin Interpol member ram enforcement agency-te chuan an ramah Nirav Modi hi zawngin an hmuh chuan an man nghal thei dawn a ni.

Dik lo taka PNB kaltlanga sum tham tak tihchingpenaa mawphurtu bera puh, Nirav Modi hi thubuai siamsak a nih hmain India ram chhuahsanin a bibo hman a, London-ah a khawsa mek nia sawi ni. Investigative agency-ten man tumin an zawng mek a, a passport pawh cancel sak a ni tawh bawk. Mahse heti chung hian kum 47 mi Modi hi ṭum li zet UK-ah a lutin a chhuak thei tho a ni.

PNB-in CBI-a complaint an thehluh hmain Nirav Modi leh a nupui US citizen nei Ami te, a unaupa Belgian citizen nei Nishal leh a pu Choksi-te chuan India ram a chhuahsan hman a ni. CBI hian May thla khan Modi-a lakah hian chargesheet thehlutin, Letters of Undertakings (LoUs) leh Foreign Letters of Credit (FLCs) dik lo taka siam hmangin Mumbai-a PNB Brady House aṭangin cheng vaibelchhe 7080.86 zet an bum chhuak niin a sawi. Hei hi ram chhunga bank-a inbumna thleng tawh zinga lian ber a la ni bawk.