Congress hruaituten J&K politics dinhmun sawiho

Congress Party hruaitute chu nimin khan Delhi-ah inhmukhawmin, Jammu and Kashmir politics dinhmun an sawiho. J&K-ah hian BJP chu PDP(Peoples Democratic Party )-BJP ṭangrual sorkar aṭanga a inhnuhdawh hnuah, PDP hian party mala sorkarna a siam theih loh avangin Governor's Rule hnuaiah dah zui an ni.

Nimina Congress hruaitute meeting hi prime minister hlui Manmohan Singh-a chenna inah chawhma dar 11:30 aṭanga neih a ni. United Progressive Alliance (UPA) hotu Sonia Gandhi chuan Manmohan Singh-a chairman-na hnuaiah Committee on Kashmir hi a lo din tawh a ni. He committee-ah hian party hruaitu hlun Dr Karan Singh, P Chidambaram, Ghulam Nabi Azad, Ambika Soni te pawh an tel. Nimina meeting-ah hian J&K-a PDP-BJP thawhdunna tihtawp a nih tak vangin PDP nena thawhdun theih dan tur chungchang pawh an ngaihtuah tel dawn nia tarlan a ni.

Mahse Congress chuan Pathianni khan tun maia PDP nena thawhdunna tur siam an tum lo thu an sawi, PDP hruaitute pawh an be lo niin Rajya Sabha-a eptu pawl hruaitu Ghulam Nabi Azad chuan a sawi.

Jammu and Kashmir assembly, member 87 awmnaah hian PDP chu party mala seat ngah ber niin seat 28 sa nei a, Congress hian seat 12 a nei a ni. Sorkar siam tur hian seat 44 chin neih phak a ngai a, PDP hian CPI(M) leh independent member-te thawhpui dan a ngaihtuah mek nia sawi a ni.