Kejriwal-an Delhi state puitlinga dah phutna campaign ṭan

Delhi Chief Minister Arvind Kejriwal-a chuan state puitlinga Delhi hlankai phutin Pathianni aṭang khan campaign a ṭan a, deputy CM Manish Sisodia leh Aam Aadmi Party ( AAP) hruaituten an ṭawiawm.

Delhi-a rorellai AAP hruaitute chuan mipuite chu an thil phut thlawp tur hian an ngen a, vawiin aṭangin signature campaign pawh ṭan an tum a ni.

CM Kejriwal-a chuan Pathianni khan BJP leh Congress party chu Delhi tana state phut chungchangah an ngaihdan dik tak tichiang turin a phut bawk.

Nimina state puitlinga hlankai phutna campaign hawnnaah Kejriwal-a chuan, "Prime Minister Narendra Modi chuan kum 2014 Lok Sabha inthlanpui neih dawna a campaign-naah Delhi chu state puitlinga hlankai a tiam a, hei vang hian Lok Sabha seat pasarihah BJP an chak theih phah a ni. A thutiam tihhlawhtling tur hian kum khat hun a la nei a, mahse hei hi a tipuitling lo a nih chuan kum 2019 inthlanpuiah Delhi chuan BJP chu seat khat pawh a pe tawh dawn lo a ni",a ti.

Campaign hawnna inkhawm hi Indira Gandhi Indoor stadium-ah neih a ni a, he hunah hian AAP MLA, worker bakah an hmalakna thlawptu hrang hrangte an tel bawk.

AAP chuan state pek phuta an hmalakna chu thlawp turin mipuite a ngen a, hemi atana an campaign zawm duhte tan phone number tilangin, he number hi miss call mai turin an ti a ni. July 3–25 chhungin signature campaign an nei dawn bawk a, hemi chhung hian mi nuai 10 vel signature lakkhawm hman an tum a, hei hi Prime Minister hnenah an thawn dawn a ni.