WhatsApp-a thu dik lo thehdarh vangin mi 5 sawisa hlum

Whatsapp-ah naupang rukbo ching ni anga thu dik lo thehdarh vangin Maharashtra-a Dhule-ah mi panga sawisak hlum an ni a, nimin khan hetiang thu vek thehdarh a nih vangin mi pali chu Malegaon-ah nikhaw hre lo khawpa sawisak an ni leh bawk. Heng thil pahnih hi darkar 24 chhunga thleng a ni.

Tun hnaiah India ramah social media lamah thu dik tawk lo thehdarh avangin nunna chan phah an awm nual tawh a ni. Pathianni khan Dhule district-a Rainpada khuaah mi panga chu naupang rukbo ching nia Whatsapp lama thehdarh a nih vangin mipui thinrimin an sawisa hlum a ni. Maharashtra police-te chuan he pawikhawihnaa inhnamhnawih mi 23 chu nimin zing khan an man tawh a, mipuiten mi panga an sawisak lai video pawh hi hmuh tur a awm bawk.

Nimin kahn Malegoan khuaah mi pali chu naupang rukbo ching tia thu thawndarh a nih angin mipuiten an sawisa leh bawk a, mahse an sawisak hlum hmain police-te inrawlhin an chhanchhuak hman a ni. Police-te chuan heng mi pali-te hi damdawi-inah hruai nghal an ni thu sawiin, an dinhmun a ṭha vak lo tih an sawi.