Anna Hazare-a'n chaw ngheia nawrh huaihawt leh tum

Social activist Anna Hazare chuan sorkar laipuiin central-a eirukna dotu tur, Lokpal ruat hun a tihkhawtlai zel avanga a lungawi lohna lantir nan October 2 aṭangin tiam chin awm loa nawrh huaihawt a tum.

Hazare chuan eirukna laka fihlim ram siam a nih theihna tura a beihna kawngah mipuite chu a hmalakna hi thlawp turin a sawm nghal bawk.

Eirukna dotu, Hazare chuan, "Mahatma Gandhi piancham, October 2 aṭang hian kan khua, Maharashtra-a Ahmednagar district-a Ralegan Siddhi khuaah chawi ngheia nawrh ka huaihawt leh ṭan dawn a ni," a ti.

Hazare chuan central-a BJP kaihhruai NDA sorkar chu sawiselin, Lokpal ruat a, Lokpal Bill hman pawh a tiam tawh a ni tih sawiin, hengte hi Parliament-ah pass vek tawh niin kum 2014 January thla khan President pawhin a hming a ziah hnan tawh niin a sawi. "Mahse NDA sorkar hian eirukna umbo tuma tih tak takna a nei lo a, hei vang hian Lokpal ruat chungchangah pawh chhuanlam hrang hrang siamin a tikhawtlai zel a ni," a ti.

Kum 2011 khan Hazare hian Lokpal Bill pass phutin ni 12 chhung chaw ngheiin nawrh a lo huaihawt tawh a, a hmalakna hian ramchhung hmung hrang hrangah thlawp a hlawh hle. Nawrh a huaihawt hnuah hian central-a Congress kaihhruai UPA sorkar chuan Lokpal Bill hi a pass ta a ni. Supreme Court pawhin kar hmasa khan NDA sorkarin Lokpal tana search committee member ruatna tur a tikhawtlai reng avangin sorkar laipui lakah a lawm loh thu a lo sawi tawh bawk.