Nepal ramah India mi 1500 chuang tangkhang

Nepal rama Biakzina kal, India mi 1,500 chuang chu ruahsur nasa avangin an tangkhang mek. Heng mite ṭanpui dan tur hi Ministry of External Affairs chuan a ngaihtuah mek.

Kailash Mansarovar yatra hmangin Nepal ramah hian India mi tam tham tak an kal a, mahse ruahsur vang hian Simikot-ah mi 525, Hilsa-ah mi 550 leh Tibet lamah mi 500 vel an tangkhang mek a ni. Nepal-a Indian embassy chuan heng mite dinhmun enfiah leh ṭanpui dan ngaihtuah tur hian Nepalganj leh Simikot-ah mi a tir tawh bawk. Khualzin tangkhangte awmna tur ngaihtuahsak an nih bakah ei turte pawh pek an ni a, Simikot-ah chuan kum upa zawkte hriselna dinhmun pawh enfiahsak an ni tawh bawk niin Minister of External Affairs Sushma Swaraj-i chuan a sawi.

Minister chuan Nepal sorkar hnenah India mi tangkhangte hruaichhuak tur hian army helicopter tir tura an ngen thu a sawi. Khualzin tangkhang leh an chhungte tana hotline pawh siamin, heta ṭang hian Tamil, Telugu, Kannada leh Malayalam ṭawngin ṭhil awmdan hriattir an nih thu a sawi bawk.