Hmeichhiate tan taxi a him tawk lo - Maneka Gandhi

Women and Child Development minister Maneka Gandhi chuan Transport Minister Nitin Gadkari hnenah lehkha thawnin, cab company te chu safety guideline siamte chu ṭha taka zawm tura nawr turin a ngen.

Tun hnaiah taxi driver-te an passenger hmeichhiate chungah mawi lo takin an che nia report a awm fo avangin Gandhi hian Thawhṭanni khan minister hi lehkha a thawn a ni. Ministry of Women and Child Development chuan taxi driver-te meeting neihpui ṭhinnaah, thil awmdante sawipui fo ni mah se, thuneitute himna tura inkaihhruaina an siamte chu an zawm ṭha lo hle niin a sawi. Police-te driver te enfiah tir te, taxi-a central lock tihtawpte pawh an zawm lo hle tih a sawi.

Tunhnaiah Bengaluru-ah Ola cab driver-in a hmeichhe phurh chu a thawmhnaw a phelh luihtir a ni. He thil thlen hnu hian Gandhi chuan taxi hmangtu hmeichhiate himna ngaih pawimawh a ṭul thu sawiin, hmeichhe passenger-te tan chuan an himna turin a mal ni lo, taxi inhmanṭawm maite pawh a ṭhat zawk mai theih thu a sawi bawk.