Bihar Shelter Home-a pawngsual thubuai CBI kutah hlan

Bihar sorkar-in shelter home a siamah hmeichhe naupang kum tling lo eng emaw zat pawngsual an nih thubuai hu Central Bureau of Investigation (CBI) kutah hlan a ni ta. CBI kuta thubuai hlan a nih hnu hian Balika Grih, Muzaffarpur-a shelter home-a officer leh thawktute laka thubuai ziahluh a ni.

Eptute nawrna avangin Bihar sorkar chuan shelter home-a pawngsualna thleng nia sawi chungchang hi kar kalta Ningani khan CBI kutah a hlan a ni. He thil thleng kaihhnawihah hian mi 10 man an ni tawh. Medical report-a a lan danin, Muzaffarpur-a sorkar siam shelter home-a hmeichhe naupang enkawl 34 te chuan pawngsual an tawk a ni. Hemi hmaa medical examination neihah shelter home-a awm mek 42 zinga 29 chu thla eng emaw zat pawngsual an lo ni tawh nia sawi a ni bawk.

CBI thupuangtu chuan Seva Sankalp Evam Vikash Samiti enkawl, hmeichhe naupang enkawlna hmunah naupangte chu kutthlak leh mipat hmeichhiat lama khawichhiat nia sawi an nih vangin chhui zui an ni tih a sawi. Kumin kumtir lam khan Bihar Social Welfare Department chuan shelter home enkawltu lakah hian FIR a thehlut a, state sorkar chuan he thil hi special investigation team a chhuitir a ni. Chhui an nih hnu hian he home enkawltu NGO hi blacklist-ah telh nghalin, he hmuna naupang awmte chu Patna leh Madhubani-a home-ahte sawn an ni.