Thuneihna tak tak chu mipui thlan sorkar kutah a awm : SC

Supreme Court chuan nimin khan Delhi-a Aam Aadmi Party (AAP) sorkar leh Lieutenant Govenor Anil Baijal te inkar thuneitu zawk nih inchuhna awm chu ngaihtuah, thuneihna tak tak chu mipui thlan sorkar kutah a awm tih a sawi.

Court chuan state sorkar chuan pawn lam mite inrawlh loin, zalen takin ro a rel thei tur a ni tiin, Lieutenant Governor pawh chuan a sawiselna lam ringawt ngaituah loin ṭha takin Delih sorkar chu a thawhpui tur a ni, a ti.

Chief Justice of India Dipak Misra chuan, "Cabinet chuan a thutlukna siam zawng zawngte chu Lieutenant Govenor a hriattir ang a, mahse thil zawng zawngah LG remtihpuina leh pawmpuina hi a ngai ve kher chuang lo", a ti.

AAP chuan court thutlukna siam dan chu lawmawm a tih thu sawiin, democracy tana hnehna ropui tak a nih thu a sawi.

Constitution leh dan hnuaiah Delhi sorkar hian Delhi-a ram, sorkar hnathawk lian leh police te chungah thuneihna a nei lo a, thil dangah chuan sorkar thurawn angin LG hian a kalpui tur a ni. Hei hi sawichhuakin, Supreme Court pawhin land, police leh public order tih lohah chuan Lt Governor chuan ram danpui hnuaia a mimal thutlukna siam turin thuneihna a nei lo a ni, a ti. Hemi rual hian Lt Governor leh council of minister-te chuan harsatna awmte chu sawihoin chinfel dan an ngaihtuah tur a ni, a ti bawk. Sorkar laipui leh state sorkar chuan inlaichinna ṭha tak an nei tur a ni tiin Chief Justice Misra chuan a sawi.

Delhi-a AAP sorkar hian Lt Governor chu a thuneihna hmangsualah puhin, Delhi sorkarin thutlukna a siamte lo dan sak ṭhinah a puh a ni. Kum 2015-a Delhi-a AAP-in sorkarna an siam hnu lawkah khan central-a rorellai, BJP kaihhruai NDA sorkar chuan state sorkar kut aṭangin anti-corruption unit chu a laksak nghal a ni. Hemi hnu hian sorkar laipui hian kum 1998-a BJP hruaitu LK Advani-an Delhi sorkar tana ngaihnathiamna a lo pek tawh, police, public order leh bureaucratic appointment siam dawn reng rengah LG chuan mipui thlan sorkar chu a rawn zel tur a ni tia a lo dah tawh chu a sut nghal bawk. Sorkar laipui thiltih dan hi Delhi sorkar nena inkar boruak ṭha lo awm chhoh ṭanna ni.

Delhi Chief Minister Arvind Kejriwal chuan Lieutenant Governor chu state sorkar thawhpui duh lo a, Prime Minister Narendra Modi-a kaihhruai thu ang anga a awmah a puh a, state sorkarin thutlukna pawimawh a siamte pawh LG hian sorkar laipui thurawn angin a lo dansak zel a ni, a ti.