EC-in poll code bawhchhiate report-na tur app tlangzarh

Election Commission chuan inthlan neih laia dan bawhchhiate video leh thlalak report theihna tur Android-based app chu Thawhlehni khan a tlangzarh.

He app hi 'cVIGIL' tih a ni a, “citizens’ vigil”tihna a ni. Tun hnaia Karnataka-a Bengaluru-a inthlanah hian enchhin a lo ni tawh a ni. He app kaltlang hian inthlan laia dan loa thilti, vote zawnna ataa pawisa leh thilpek dang sem leh inhuatna chawk tho thei zawnga thu sawite pawh report theih vek a ni dawn a ni.

EC chuan he app hi Bengaluru-a enchhin a nih hnuah, assembly inthlan hmabak Madhya Pradesh, Rajasthan, Chhattisgarh leh Mizoram-ahte hman zui a tum a ni. Official chuan Bengaluru-a enchhin tura kalpui a nih hian vawi 800 chuang zet download a ni tih a sawi a, app kaltlang hian complaint pawh eng emaw zat an dawn thu leh, hemi hmang hian dan bawhchhiate an man theih bakah, an lakah action pawh an lak theih phah niin a sawi.