Loneitute'n tractor rally neih tur ṭhulh

Loneitute pawl hrang hrang intelkhawm, Samyukta Kisan Morcha chuan Parliamaent Winter Session ṭanni, vawiina Parliament pana tractor rally neih an tum chu an ṭhulh. Mahse farm law duh lohna an lantirna erawh an la tawpsan dawn lo tih an sawi.

Kar liam ta Inrinnia New Delhi-a loneitu pawlten meeting an neihah tractor rally neih tura ruahmanna an lo siam tawh hi an ṭhulh a ni.

Tun thla tir khan loneitu pawlte hian Parliament session ṭan hunah farm law duh lohna lantirin nitin Parliament panin loneitu 500 chinin tractor rally neih ziah an tum tih an lo sawi tawh a ni. Sorkar laipuiin farm law pathumte sut leh an ni dawn tih a puan hnuah pawh tractor rally hi kaltlangpui an tum thu an sawi a, mahse Inrinni meeting-ah khan an ṭulh ta a ni.

Loneitute hian tractor rally hi ṭhulh ni mah se, Parliament-a farm law pathum sutna tihfel a nih hma chuan heng dan duh lohna an lantir chu an la chawlhsan dawn lo tih an sawi. Hei bakah hian nawrh huaihawt chhunga state sorkar hrang hrang leh railways ministry lamin loneitu thubuai an siamsakte pawh sut vek turin an phut a, MSP chungchangah Centre-a inrawlh loh chuan lungawi lohna tawpsan mai an tum loh thu an sawi bawk.

"PM Narendra Modi chuan lungawi lohna lantir chhunga thubuai thehluhte chu sut vek turin state sorkar leh Railways-te thu a pe tur a ni," tiin Samyukta Kisan Morcha leader chuan a sawi.

Union Agriculture Minister Naresh Tomar chuan kar liamta Inrinni khan loneitute thubuai siamsak chungchangah hian dan anga hma lakna tur state sorkar kutah a awm tih sawiin, anni hian thutlukna an siam dawn tih a sawi tawh a ni.

November 19 khan prime minister Narendra Modi chuan Guruparb puala thu a sawiah, buaipui hlawh tak farm law pathum siam tharte chu sut leh vek an ni dawn tih a puang. Heng dan sutna tur hi Parliament Winter Session-ah hian tihfel a ni dawn a, vawiin hian Union Agriculture Minister sutna tur, Farm Laws Repeal Bill a pharh nghal dawn nia sawi a ni.