Omicron variant hmuhna ram aṭanga flight luh khap turin Delhi CM Kejriwal-a'n PM Modi hnenah a ngen

Covid-19 hri thar, Omicron variant hmuhchhuah thar a nih leh avangin ram hrang hrangten hri laka invenna turin hma an la chho leh ṭan a, khualzin luh khapna leh inkhuahkhirhna dante an siam thar leh hlawm.

Delhi chief minister Arvind Kejriwal pawhin nimin khan prime minister hnena lehkha a thawnah, Omicron variant hmuhna ram aṭanga thlawhtheihna luh khap thuai turin a ngen. "Kum khat leh a chanve chhung zet coronavirus doin hun khirh tak kan hmang a ni. Covid warrior-te inpekna leh hun khirh kan paltlang hnuah hri leng lakah pawh kan ziaawm chho ve thei chauh a ni," a ti. Hetih lai hian South Africa lamah Covid variant thar, inkaidarh awlsam tak nia sawi a darh leh tak avangin ram eng emaw zatin khuahkhirhna an siam a, India pawhin a siam ve thuai a ngai a ni tiin a sawi.

"He variant-in India ram a rawn lut tur venna turin kan theih dan ang anga hma kan lak nghal a ngai a ni. Heng hri hmuhna ram aṭanga thlawhtheihna luh khap nghal turin ka ngen che a, he hri kai India rama an rawn luh chuan kan ram tan a pawi dawn lutuk a ni," a ti.

Delhi deputy chief minister Manish Sisodia pawhin Covid variant thar a awm leh avangin department hrang hrangte pawh inralring tura hriattir an ni tih a sawi a, mipuite chu punkhawmna hmuna kal lo tur leh, theihtawpa fimkhur turin a chah nghal bawk.