PM Modi-a'n Mann Ki Baat vawi 83-na hmang

Prime minister Narendra Modi chuan nimin khan thla tina radio programme a hman ṭhin, Mann Ki Baat vawi 83-na a hmang.

Ram mipuite tana thuchah a sawiah, Prime Minister chuan, "Thuneihna ka zawng lo a, mipuite tana rawngbawl tu nih ka duh a ni" a ti.

PM Modi chuan India rama start-ups chungchangte sawiin, leilung humhalh a pawimawh zia leh armed forces-te zahna a lantir a ṭul thu a sawi bawk. Covid-19 hripui leng chu a la tawp lo a, mipuite chu inralring reng turin a ngen nghal bawk a ni.

India rama start-up culture chungchang chu sawizauin, PM Modi chuan "India ram ṭhanna tura hun pawimawh takah kan awm mek a ni. Thalaite hi hna zawngtu mai ni loin hna siamtu an ni tawh a, India ramah unicorn 70 chuang an awm tawh," a ti. Unicorn hi private startup company, USD tluklehdingawn khat hu hlutna nei chinte an ni.

Narendra Modi chuan thla leh hian kum 1971 indonaa India-in Pakistan an hneh champha kum 50-na champha a thleng dawn tih a sawi a, India sipaite chu zahna a hlan nghal bawk.

"Ni hnih hnuah December thla kan chuangkai tawh dawn a. Ramchhungah Navy Day leh Armed Forces Flag Day lawmna hun hman a ni dawn. December 16 hian kum 1971-a indonaa kan chak lawmna champha kum 50-na kan hmang dawn a, heng hunah hian kan sipaite hriatreng ka duh a ni," tiin PM Modi chuan a sawi.

Mann ki Baat radio programme episode hmasaa a sawi tawh angin, PM Modi chuan kan chenna leilung humhalha enkawl ṭhat a pawimawh zia a sawinawn leh bawk. "Kan chenna leilung pianhmang leh thianghlimna kan khawih danglam emaw kan suasam emaw hian keimahni bawkin kan tuar a ni," a ti. Hmun tam takah khawtlang mipuite chuan leilung hausakna, natural resources venghim turin hna an lo thawk ṭhin tih sawiin, "Mipuite hian leilung dan kalhmang leh hausakna tibuai lo zawnga nundan kan inzirtir a ngai a ni," tiin PM Modi chuan a sawi.