Shashi Tharoor-a bail dilna pawmsak

Delhi-a Patiala House court chuan nimin khan Congress hruaitu Shashi Tharoor-a chu a nupui Sunanda Pushkar-i thih dan chungchangah thubuai siamsak a nih hnuin bail-a chhuah a phalsak.

Court chuan Tharoor-a hi cheng nuai khat dah turin a ti a, court phalna lo chuan India ram chhuahsan a khapsak bakah, a nupui thih dan chungchanga finfiahna awm leh thuhretute laka inrawlh lo turin a ti bawk.

Thiruvananthapuram MP hi a nupui thih dan chungchanga thu zawhfiah a ni tawh a, mahse a nupui thihna chungchannga an puhna hi thu belhchian dawl lo niin a sawi. A nupui thihnaa inhnamhnawihna a neih loh thu a sawi a, mahse Delhi court a laka thubuai siamsakna tur chhan ṭha tak a awm niin a sawi thung.

Delhi police-te chuan Sunanda Pushkar-i thihna chungchangah Indian Penal Code-a Section 498 A (hmeichhe chunga a pasal/chhungte rawng taka chetna thleng) leh 306 (intihhlum duhna nei khawpa nawr) hnuaiah Metropolitan Magistrate Dharmender Singh-a hnenah chargesheet, phek 3000 zeta chhah an thehlut tawh a ni. Chargesheet thehluhah hian mawhphurtu berah Tharoor hi ziah a ni a, a nupui chungah a che rawng hle nia sawi a ni.

Sunanda Puskhar-i hi kum 2014, January 17 zan khan luxury hotel room-ah thi a hmuh a ni.