WBengal CM-in inrenchemna kalpui dawn

West Bengal Chief Minister Mamata Banerjee-i chuan a kaihhruai sorkar chuan inrenchemna kalpuiin, department hrang hrangte sum hman zat pawh a titlemdawn tih a sawi. Official-te pawh inrenchem tura hriattirin, zin chhuahte pawh a pumpelh theih ang chu pumpelh a, state hotel-a meeting an neih ṭhin pawh titawp turin ngen an ni.

CM Banerjee-i chuan sum hman tur titlem tura hma an lakna hian public scheme 'Kanyashree' kalpui mekah nghawng a nei dawn lo tih a sawi nghal bawk.

Sorkar sum hman dan chungchanga meeting an nei hnua chanchin thar lakhawmtute a kawmnaah, Banerjee-i chuan, "Department hrang hrangte sum hman dan hi uluk takin kan enfiah dawn a ni. Thil ṭul loah chuan sum kan hmang mai tur a ni lo a, hemi rual hian public services tana sum hman kan khuahkhirh dawn tihna a ni chuang lo. Public scheme te chu a nghawng dawn lo a ni", a ti. Meeting-ah hian CM bakah Chief Secretary Malay De bakah department senior official te, financial advisor leh director-te an tel a ni.

State sorkar chuan tunkar tir lam khan hriattirna a lo tichhuak tawh a, officer-te chu a ṭul takah loh chuan sum hmang lo turin a ngen a ni. Hei bakah hian Delhi leh state danga an zin ṭhinte pawh titlem turin a ti bawk. Meeting tura district official-te Kolkata-a koh

ṭhin pawh titawp a, video conferencing te hmang uar zawk turin an ti.

Hei bakah hian post thar siam, motor lei thar leh thilpek manto tak tak inpek ṭhin pawh khuahkhirh a rawt bawk. West Bengal sorkar chuan hnathawktute DA atan cheng vaibelchhe 5,000 bakah sorkar laipuiah loan rulhna tur cheng vabeichhe 46,000 pek tur a la neih thu sawiin, CM chuan inrenchemna an kalpuina aṭanga sum an humte chu hnathawktute hlawh leh loan rulhna atan hian hman a ni thei dawn a ni, a ti.

State sorkar hian sorkar lapui hnena a loan ba hi cheng vaibelchhe nuai 2.24 a pe tawh a ni.