India-ah Zakir Naik thawn a ni dawn lo : Malaysia PM

Malaysia Prime Minister Mahathir Mohamad chuan an rama awm mek, Islamic sakhaw zirtirtu Zakir Naik chu India ramah thawn kir a ni dawn lo tih a sawi.

Television preacher, Zakir Naik hi firfiaka chetna thlen tura fuih leh inhuatna chawk tho thei zawnga thu a sawi avangin sorkar laipui chuan manna tur thupek a tichhuak tawh a ni. Mahse man a nih hmain kum 2016 khan India a chhuahsan a, Msulim tamna ram Malaysia-ah kalin an rama awm ngheh phalna an lo pe a ni.

Sorkar laipui chuan Naik hi a thubuaite hmachhawn tura India rama thawn kir turin Malaysia sorkar hi a ngen a ni. Ram pahniht hian an mi man duhte inpek tawn theihna tur inremna an lo siam tawh a ni.

Mahse Malaysia PM chuan Kuala Lumpur-a news conference a neihah Naik hi India rama thawn kir an tum lo tih a sawi. "Kan ramah harsatna a siam a nih loh chuan kan thawn kir dawn lo a, Malaysia-a awm ngheh phalna pawh pek a ni tawh a ni", a ti.

Media report chuan kum 52 mi, Naik hian India rama kir a duh niin an sawi a, mahse hei hi amah chan phain, a thubuaite dik leh felfai taka ngaihtuah sak a ni dawn tih a chian hma chuan India rama kir tumna a nei lo tih a sawi.