State leh UT-te thuthang dik lo vanga insawisakna thleng veng turin ti

Union ministry of home affairs (MHA) chuan state leh Union Territories (UT) sorkarte chu tunlaia social media lama naupang ruk ching tia thu dik lo thehdarh vanga insawisakna hlumna thleng ṭhin chu enfiah tur leh, veng tura hma la turin a ti.

Thla hnih kalta chhung khan naupang ruk ching nia sawi thuthang dik lo avang hian mi 20 chuang mipui thinrimin an sawisa hlum tawh a, a hnuhnung ber chu Maharashtra-a Dhule district-a mi panga sawisak hlum kha a ni.

Ministry chuan ST leh UT-te chuan naupang ruk ching nia thuthang awm ṭhinte chu ngaihven thuai a, a ṭul anga hma la turin a hriattir. Hetianga buaina a thlen hlauhawm zualna hmunte pawh chhinchhiah a, tualchung te pawh inzirtirna pe turin a ngen a ni.

State sorkar-te chu naupang ruk ching nia sawi chungchanga complaint awmte pawh uluk taka chhui chiang nghal turin ministry chuan a chah bawk a, kar tir lamah WhatsApp lam thuneitute hnenah thu dik lo leh buaina thlen thei tur thu thehdarh ṭhin veng tura hma la turin alo ngen tawh bawk.