BJP MP-in India zalenna tura thawk loah Kristiante puh

Bharatiya Janata Party (BJP) hruaitu hlun leh Mumbai MP ni lai Gopal Shetty chuan Kristiante chu English leh English ṭawng hmangtu 'angrez' niin a sawi a, India-in zalenna a sualnaah khan Kristiante chuan eng thil mah an ti ve lo a ni, a ti.

Mumbai-a Shia Kabrastan Committee buatsaiha Malvani-a Eid-E-Milad puala inkhawm buatsaihah Shetty chuan Kristiante chu beiin, Kristian-te chu British an ni a, India zalenna tura beihnaah pawh an tel lo, Hindu leh Muslim-te chauh an tel a ni, a ti. India zalenna tur hian Hindu leh Muslim-te chuan inpumkhatin an bei a ni, a ti.

BJP MP thusawi hi Congress party chuan an chhang let nghal a, BJP chuan India history engmah an hre lo niin an sawi. BJP chuan India chanchin hre lo leh, sakhaw hrang hrangte inkara inhuatna thlen tumah an puh. Telangana Congress pawhin BJP leh Rashtriya Swayamwewak Sangh (RSS) bei letin, RSS hotute leh Hindu Mahasabha chuan mi leh sate chu India zalenna sualnaa tel lo turin an hriattir zawk a ni tiin, hei hi BJP history dik tak zawk niin a sawi bawk.