Farm law pathum sûtna tur bill Parliament in hnihah pass nghal

Parliament Winter Session chu nimin khan ṭan a ni a, session ṭanni hian Farm Law pathumte sutna tur bill chu Parliament in hnihah pass nghal a ni a, nizan vek khan President Ram Nath Kovind chuan a hming a sign hnan nghal rin a ni bawk.

Union agriculture minister Narendra Singh Tomar chuan Parliament in hnihah Farm Laws Repeal Bill, 2021 hi a pharh a, voice vote hmangin pass a ni.

Lok Sabha-ah chhun dar 12:06 khan Farm Law sutna tur bill hi pharh a ni a, eptuten sawiho phawt phut mah se, sawiho loin chhun dar 12:10-ah pass a ni.

Rajya Sabha-ah chuan hun rei vak lo an sawiho hnuah pass a ni bawk. Congress hruaitu Mallikarjun Kharge chuan he bill hi party zawng zawngin an thlawp tih a sawi. Hemi rual hian BJP kaihhruai sorkar laipuiin Farm Law a sutna chhan chu state panga assembly inthlan lo awm tur vang nia a ngaih thu a sawi zui bawk.

Lok Sabha-a eptu hraitute chuan dan siamte sut/ṭhiah a nih dawn chuan sawiho phawt a ni ṭhin tih an sawi a, mahse BJP sorkar chuan mininum support price (MSP) chungchang sawizui an hlauh avangin sawihona hun hi a siam duh lo niin an puh.

Parliament session hi December 23 thleng neih a ni dawn a, session chhung hian rorel ṭhutkhawm ṭum 18 neiin, sorkar chuan legislative bill 30 chuang leh financial bill pakhat pharh a tum.