India-in khuahkhirhna thar tichhuak

Covid-19 variant thar Omicron vangin India chuan nimin khan rampawn aṭanga khualzin rawn lutte chungchanga inkaihhruaina dan thar tichhuakin, December 1 aṭanga hman ṭan tura tih a ni.

South Africa rama Covid-19 variant thar 'Omicron' hmuhchhuah a nih avangin prime minsiter Narendra Modi thurawn angin Pathianni khan union home secretary Rajesh Bhushan kaihhruaiin urgent meeting neih a ni a, inkaihhruaina thar hi an siam.

Ram tam takin Omicron variant vang hian zin veivah khapna pawh an lo siam tawh a, sorkar laipui pawhin hma a la zui ve nghal a ni. State leh union territory-te chu ram dang khualzin lutte uluk zawka enfiah a, an zin tawhna chinte chiang zawka report tir turin a hriattir tawh bawk.

Omicron variant vanga sorkarin khuahkhirhna a siam thar te :

Ramdang 'at risk' category aṭanga India rama rawn lutte chu (Covid-19 vaccine la tawh te pawn) airport-ah test an neih leh a ngai.

Airport-a coronavirus kai hmuhchhuah an awm chuan inkaihhruaina dan awmsa angin enkawl an ni dawn a, an sample te hi 'Whole Genome Sequencing'-ti tura lak a ni ang.

Khualzin, Covid test negative te pawh ni sarih chhung an inkhunghran a ngai dawn a, India an rawn luh aṭanga ni riatnaah test nawn leh an nih bakah ni sarih chhung an hriselna dinhmunte uluk taka inenfiah ṭhin tura tih an ni.

Thupek thara tarlan dangin , 'at risk category'-in a huam loh ram aṭanga rawn lut zinga 5% te chu random test neih sak an ni bawk ang.

Sorka laipuiin 'at risk' rama a puan te chu : European ramte, UK, South Africa, Brazil, Bangladesh, Botswana, China, Mauritius, New Zealand, Zimbabwe, Singapore, Hong Kong leh Israel ramte an ni.

Khualzin rawn lut, Covid-19 positive nena inhnimhnai zawng zawngte (primary contact) chu ni 14 chhung an inkhunghran hnuah test neih leh tura tih an ni. Seaports/land ports aṭanga khualzin rawn lutte pawhin he inkaihhruaina dan thar hi zawm ve tura tih an ni bawk.