SC-in pollution panel thupek zawm turin Delhi-NCR sorkarte ngen

Supreme Court chuan nimin khan Delhi leh national capital region (NCR) huamchhunga boruak bawlhhlawh zel chu a ngaihṭhat thlak loh hle tih a sawi.

Court chuan Delhi, Haryana, Uttar Pradesh leh Punjab sorkarte chu Commission for Air Quality Management thuchhuakte zawm zel turin a ngen a, heng state-te hi report thehluh tura ti bawkin, Ninganiah an hmalakna hi ngaihtuah leh a ni ang.

Delhi Metro Rail Corporation (DMRC) chu metro zauh hna thawh lina thawh mekah thingkung pakhat pawh an kih hmain chief conservator of forest hnenah phalna la hmasa zel turin a hrilh a, Delhi sorkar chu khawpuiah thing tam zawk phun tura ruahmanna siam tur leh kar 12 chhunga report thehlut turin a hrilh bawk.

SC hian boruak bawlhhlawh zual zel karah Covid-19 variant thar Omicron hmuhchhuah tharin buaina a belhchhah thei tih an sawi.

Thawhṭanni zing khan khawpuia boruak, air quality chu "very poor" category-ah awmin, overall air quality index (AQI) chu 370 a nih thu System of Air Quality and Weather Forecasting and Research (SAFAR) chuan a tarlang.