RS-a eptu MP 12 suspend-na sût duh lo ; House aṭangin eptu member-te chhuak tau

Rajya Sabha chairman M Venkaiah Naidu-a'n eptu party MP 12-te suspend-na hlip tura ngenna hnawl avangin, nimin khan Rajya Sabha aṭangin eptu party MP chu lungawi loin an chhuak tau.

Parliament Winter Session ṭanni, Thawhṭanni khan eptu MP 12-te hian session neih zawh tak, August thlaa Monsoon Session neih lai, August 11-a House chhunga an chet dan mawi lo tak avangin Winter Session neih chhunga tel ve thei loin suspend an ni.

MP suspend-te hi Congress member paruk, Trinamool Congress leh Shiv Sena party member pahnih ve ve, CPI leh CPM member pakhat ve ve an ni.

Thawhṭanni khan MP 12-te suspend-na tur motion hi parliament affairs minister Pralhad Joshi chuan pulutin, eptu lamin nasa taka an sawisel chungin voice vote hmangin pass a ni. Sorkar lam thiltih dan chu democracy kalphung lo leh, tun hma lama thiltih dan ngai lo a ni tiin eptu lam hian an sawisel nasa hle. Session hmasa lama thil thleng chungchang a hnu session-ah hremna lo lekkawh chu danin a remti lo a, parliamentary law kalh a nih thu an sawi.

Nimin zing khan eptu party 16 aiawhte chuan Rajya Sabha chairman Naidu hmuin, MP 12-te hremna sut turin an ngen a ni.

Mahse nimina Rajya Sabha inkhawmah Naidu chuan heng MP hremte hian an lo chet tawh danah inchhirna leh pawi tihna engmah an lantir lo tiin, ngaihdam an dil loh avangin hremna hi sut a ni dawn lo tih a sawi a ni. Hei vang hian eptu party member-te chu lungawi loin House aṭangin an chhuak tau a, Parliament pawn lamah Mahatma Gandhi lim bulah lungawi lohna an lantir zui bawk.

Trinamool Congress chuan an party MP-te suspend duh lohna lantirin, session neih chhung chu Parliament kawta Gandhi lim bulah nitin party MP pahnihten lungawi lohna lantir ziah dawn tih a sawi. Eptu party dangte pawh zawm ve turin an sawm nghal bawk. House-a rorel thei loa a buaina chhanah sorkar chu mawhphurtu a ni, an ti.

Lok Sabha-a Congress MP Adhir Ranjan Chowdhury chuan eptu MP 12-te suspend an nih dan chu sorkar laiin dik lo taka majority a neihna a hmanna a ni tiin, hei hi democracy dinhmun tiderthawng thei, thil hlauhthawnawm tak a nih thu a sawi.

Congress party hruaitu, Rahul Gandhi pawhin Rajya Sabha chairman-in MP hrem takte ngaihdam dil tura a phutna chu chhang letin, "Eng nge ngaihdam an dilna chhan tur? Mipuite tana Parliament-a an auchhuah vangin em ni? Hei chu a thleng lo ang," tiin a twitter lamah a chhang a ni.