Chief of Naval Staff thar Admiral R Hari Kumar

Chief of Naval Staff (CNS) thar atan Admiral R Hari Kumar chu nimin khan lak luh niin, Delhi-a South Block-ah guard of honour pek a ni. Kumar hian thla 30 chhung he hna lo chelh tawh Admiral KB Singh a thlak a ni.

CNS Kumar chuan, "Chief of Naval Staff hna ka chelh tur hi chawimawina ropui tak a ni. Indian navy chuan ram venhim leh tuipui venhim lamah chona hmachhawn turin rilru kan pek a ngai. Ka rilru leh theihna ka hlan dawn a. Ka hmaa he hna lo chelh tawhte'n hlawhtling taka Navy an lo kaihhruai tawh angin theihtawpin an hnung zui ka tum ve dawn a ni," a ti.

April 12, 1962-a piang Vice Admiral R Hari Kumar hi Indian Navy-a Executive Branch-ah January 1, 1983 khan a lut a, kum 39 dawn hna a thawh chhung hian Command, Staff leh Instructional appointment hrang hrangah a thawk kual tawh a ni. A command-na hnuaiah hian INS Nishank, Missile Corvette, INS Kora leh Guided Missile Destroyer INS Ranvir te pawh awm tawhin, Indian Navy Aircraft Carrier INS Viraat pawh a lo enkawl tawh bawk. Western Fleet-ah Fleet Operations Officer-in a awm tawh bawk a ni.