Pensioner-te tan 'unique' face recognition siam

Union Minister Jitendra Singh chuan sorkar hnathawk pension tawhte puala 'unique' face recognition technology (FRT) siam a tlangzarh. Hei hi pensioner-ten life certificate atana an hman theih tur a ni a, an tan thiltih a awlsam phah dawn a ni.

Pensioner zawng zawngte hian pension an dawn chhunzawm zel duh a nih chuan kumtin life certificate thehluh a ngai dawn a ni. Ministry of Personnel, Public Grievances and Pensions te chuan digital hmanga certificate an thehluh theihnan ruahmanna a lo siam sak tawh a ni.

Face recognition technique hmanga life certificate pekchhuah hian sorkar laipui hnuaia pensioner nuai 68 mai bakah, EPFO leh state sorkar hnuaia pensoiner te pawhin an hmang ve thei vek dawn tih union minister Jitendra Singh chuan a sawi.

"Central sorkar chuan pensioner-te mamawh phuhru turin theihtawpin hma a la a ni. Kum 2014-a thuneihna a chan khan pensioner tan digital life certificate pechhuak turin ruahmanna alo siam tawh a ni. He unique face recognition technology hian a puih belhchhah dawn a ni," tiin Singh chuan a sawi.

Singh chuan Ministry of Electronics and Information Technology bakah Unique Identification Authority of India (UIDAI) te'n tunlai thiamna hmanga Department of Pension and Pensioners’ Welfare (DoPPW) tana hamṭhatna an siamchhuah theih avangin lawmthu a sawi nghal bawk.