Rajasthan leh Maharashtra-in Modicare kalpui duh lo

Prime Minister Narendra Modi-a kaihhruai sorkarin healthcare scheme thar a duan, Ayushman Bharat National Health Protection Scheme (AB-NHPS) chu BJP sorkarna state pahnih–Rajasthan leh Maharashtra chuan a kalpui duh lo nia sawi a ni.

Official-in a tarlan danin, heng state pahnihte hian AB-NHPS scheme ang chi, hei aia an state mipui huam zau thei zawk hi an kalpui mek a, hei vang hian PM scheme duan hi hman an duh lo niin a sawi.

AB-NHPS hmang hian ram pumah mi rethei chhungkua-te hnenah damdawi lama inenkawlna kumtin cheng nuai nga pek tum a ni a, he scheme hi chhungkaw vaibelchhe 10 velin an chhawr thei dawn a ni.

Rajasthan sorkar chuan sorkar laipui scheme siam hi ṭha a ti hle mah se, an state-ah Bhamashah Swasthya Bima Yojana an hman mek vangin kalpui tur chi a ni nge ni lo an hre thei rih lo niin a sawi. Bhamashah Swasthya Bima Yojana hmang hian state chhunga mi vaibelchhe 4.5 te chu cashless health care service pek an ni. He scheme kalpui tura insurance company nena inremna an lo siam tawh chuan nakkum theng a awh dawn bawk a, hei vang hian an scheme hman mek hi tihbuai rih loh an tum nia sawi a ni.

Maharashtra sorkar chuan sum an neih loh avangin centre scheme hi kalpui a tum rih lo nia sawi a ni bawk. Maharashtra-ah hian flaship health insurance scheme, Mahatma Jyotiba Phule Jan Arogya Yojana, hman mek a ni a, he scheme hnuaiah hian mi vaibelchhe 2.2 te hnenah insurance cheng nuai hnih thleng pek theih a ni.

Odisha sorkar pawhin an state-ah hian AB-NHPS aia huam zau zawk, Biju Swasthya Kalyan Yojana an kalpui mek avangin centre flagship health programme hi hman a tum lo tih a sawi tawh bawk. Punjab leh Delhi sorkar pawhin centre scheme hi an hman dawn leh dawn loh an la sawichiang lo.

Hetih lai hian centre scheme hi hmang turin state leh UT 25 sorkarte chuan Health Ministry chu inremna an ziahpui tawh a ni.