UP sorkarin hnathawk ṭha lote kum 50 tlinah chawlh tir tum

Uttar Pradesh sorkar chuan an state-a sorkar hnathawk, hna thawk ṭha lo leh inthlahdahte chu kum 50 an tlin tawh chuan chawlh luih tir a tum.

Sorkarin thuchhuah a siamah, kumin March 31-a kum 50 tling tawhte chu an hnathawh dante enfiah vek turin department head zawng zawngte a hriattir. Sorkar hnuaia a nghet leh temporary-a thawkte chu kum 50 an tlin tawh chuan pension an dil thei vek tawh a ni, a ti. 

Department head-te chuan sorkar hnathawk, kum 50 tling tawhte hnathawh dan hrang hrangte chu enfiahin, an hnathawh dan report hi July 31-ah sorkarah an thehlut dawn a ni. An report thehluh aṭang hian hna thawk ṭha lote chu pension tir an ni ang. He thil hi sorkar hnathawkte chuan an duh lo hle a, hnathawktute chunga inlulingna chi khat nia an ngaih UP Secretariat Employees' Association president Yadavendra Mishrathu chuan a sawi.