Kashmir-a sipaite silai hmehpuahah civil mi pathum thi

Jammu and Kashmir-a Kulgam district-ah kar kalta Inrinni khan mipui pungkhawm leh sipai inkara buaina chhuakah, sipaite silai hmehpuah vangin civil mi pathum an thi. Thi zingah hian hmeichhe tleirawl pakhat a tel.

J&K-ah hian PDP-BJP ṭangrual sorkar aṭanga BJP a inhnuhdawh hnuah party mala sorkarna siam thei an awm lo a, hei vang hian Governor's rule hnuaiah dah a ni. Governor NN Vohna rorelna hnuaia dah an nih hnuah tun hi Kashmir-a inbeihna thlenga civil mi an thih ṭum hnihna a ni.

Kumin January thla aṭang khan Kashmir Valley-a tharum thawhna thlengah mi 210 an thi tawh a, an zinga mi 58 chu civil mi niin hel 104 an tel a, sipai 48 an thi tawh bawk.

Sipaiten Hizbul Mujahideen commander Burhan Musaffar Wani an kahhlum champha vawi hnihna a thlen dawn hnaih avangin tualchhung miten harsatna an siam venthawn thilah sorkar chuan venhimna khauh zawkin a kalpui mek a, mahse sipaite kuta civil mi pathum an thih leh tak avangin mipuite thinrimin buaina an chawk chhuah leh a hlauhthawnawm hle.