Union Minister-in thiam loh chantir te parṭhi a awrhtir

Union Minister of state of civil aviation Jayant Singh chuan mi sawisak hlum thubuaia thiam loh chang, bail-a chhuah tir mi pariatte parṭhi a lo awrhtir chuan sawizui a hlawh hle a, eptu party hruaiten an sawisel nasa hle.

Nikum June thlaa bawng humhalh chhuanlama hmanga Ramgarh-a lungalhtheia sumdawng, Alimuddin Ansari sawisak hlum chungchangah fast-track court chuan kumin March thla khan mi 11 thiam loh chantir, damchhung tang turin a lo hrem tawh a ni. An zinga pariatte chu kar hmasa khan Jharkhand high court chuan bail-a chhuah a phalsak a, an chhuah hnuah Zirtawpni khan Hazaribag MP Sinha chenna in hi an tlawh a, minister chuan parṭhi lo awrhtirin chithlumte a lo sem bawk a ni.

Thiam loh chantirte minister-in pangpar ṭhi a awhtir lai hi social media lamah a darh nasa a, sawizui a hlawh hle a ni.

Congress party chuan union minister thiltih dan hi sawi zuiin, Sinha leh BJP chu pawl leh sakhaw inkara inhuatna thlen thei zawnga cheah an puh. Congress chuan, "New India ah hetiang mi, tualthah vanga thiam loh chantirte hian parṭhi an dawng thei a ni ", tiin minister chetdan chu an tiel a, "BJP kaihhruai sorkara minister chuan mi sawisa hlumtute pangpar ṭhi a hlan ta hial a, Modi-a sorkar hian khawtlanga boruak ṭha lo siam hi a tum zawk em ni?' tiin a zawt.

JMM working president leh chief minister hlui Heman Soren pawhin minister thiltih dan chu sawiselin, thil zahthlak tak a ni, a ti.

CPM general secretary Sitaram Yechury chuan BJP chu India khawtlang dinhmun tichhiaah leh, inhuatna politics chawk chhuakah a puh. "Hetianga minister meuhin mi sawisak hlum vanga thiam loh chantir tawhte chawimawina a hlan aṭang hian, kan khawtlang nun tichhetute chu tunge tih zawn zui vak a ngai tawh lo", tiin a sawi.

Jayant Sinha-a pa, BJP laka hel Yaswant Sinha ngei pawhin a fapa chet dan chu a pawmpui loh thu a sawi bawk.

Hetih la hian Jayant Sinha chuan a thiltih chu insawifiahin, heng mi pariat bail-a chhuahte hian a inah rawn tlawhin, duhsakna a lo hlan mai niin a sawi thung. Mipui aiawh a ni a, dan hmanga rorelna chu humhim tura a intiam tawh thu leh, mi dik lo te hum a tum loh thu a sawi a, thil sual titute chu dan hmangin hrem an ni ang a, pawisawi lote chu chhuah zalen an ni mai dawn a ni, a ti.