Nirbhaya case : Pawngsualtute dilna hnawlsak

Kum 2012, December 16-a Delhi khawpuia bus tlan laia medical student hmeichhe kum 23 mi pawngsual rawn leh nghaisa tuten an hremna tihnepsak tura an ngenna chu nimin khan Supreme Court chuan a hnawlsak.

Pawngsual rawntu mi pali te chu thiam loh chantirin tihhlum tura an chungthu rel sak an ni tawh a, mahse an zinga pathum chuan hremna hi tihnepsak a, damchhung tang tura hrem zawk turin court-ah an ngen a ni. Nimin khan court chuan an ngenna hi ngaihtuahin a hnawlsak a ni. Heng mite hian President hnenah an laka zahnghaihna lantir a, damchhung tang tura an hremna tihnepsak tur hian an la dil leh thei ang.

Chief Justice of India Dipak Misra kaihhruai judge pathum awmna bench chuan pawngsualtute hremna pekna tura thutlukna an lo siam tawh chu ennawn ṭul an tih loh thu an sawi.

Delhi-a pawngsual rawnna thleng rapthlak tak, Nirbhaya case tia sawiah hian pawikhawihtu mi parukte chu thiam loh chantir an ni a, an zinga mi bus driver Ram Singh chu tan-in chhungah a intihlum a, pakhat chu pawikhawihna an thlen lai hian kum 18 a la tlin loh vangin juvenile home-ah dah niin, kum thum a tan hnuah chhuah a ni tawh. Pawngsual tawktu hi a hming puanzar ni loin, Nirbhaya tia sawi zui a ni a, pawngsual rawn leh ngaihsak a nih hnuah bus aṭang hian paihchhuah niin ni 16 zet damdawi-inah enkawl a nih hnuah a hliam tuar loin a thi a ni.