NDA-in a thutiam tihhlawhtling turin kum nga dang mamawh- Swamy

BJP hruaitu Subramanian Swamy chuan central-a BJP kaihhruai National Democratic Alliance (NDA) sorkar chuan a thu lo tiam tawhte tihhlawhtling turin kum nga dang a la mamawh dawn tih a sawi. Hemi rual hian finance minister a nih loh avangin ram economy dinhmun chu a ṭha lo niin a sawi bawk.

Virat Hindustan Sangam buatsaih "India's Grand Narrative" function neihnaah BJP hruaitu hian he thu hi a sawi a ni.

Rajya Sabha MP Swamy chuan, "Economic development chu vote hmuh theihna tur a ni lo. Prime Minister hlui Atal Bihari Vajpayee pawh khan a campaign-na auhlaah 'India Shining' tih a hmang a, mahse a hlawhtlin pui lo. BJP hian Hindutva chawi nun a, eirukna lama fihlim sorkar a tiam a, hei vang hian 2014 inthlanah seat tam tak a la a ni", tiin, Hindutva chuan BJP chakna turin a pui dawn a ni, a ti.

Swamy chuan central-a rorellai party chuan inthlan dawna an thu tiamte hre rengin tihhlawhtling turin a bei mek a, mahse an hmachhawpte thawk zo tur chuan kum nga dang a la mamawh a ni tiin a sawi." Kum 2014-a kan thutiamte kan tihhlawhtling thei vek lo a, mahse tihhlawhtling turin kan bei zel a ni", a ti.

Economist leh statistician ni bawk, Swamy chuan finance minister a nih loh avangin ram economy dinhmun chu a ṭha vak lo niin a sawi bawk.