Baghpat jail chhungah gangster Munna Bajrangi kaphlum

Uttar Pradesh-a Baghpat district jail chhungah gangster hlauhawm tak Munna Bajrangi chu kahhlum a ni.

Bharatiya Janata Party (BJP) hruaitu Krishnanand Rai thattua puh, Uttar Pradesh gangster Munna Bajrangi hi Baghpat court-ah hruai tur a ni a, hei vang hian Pathianni khan Jhansi aṭangin Baghpat jail-ah hian sawn a ni. Mahse Baghpat jail chhungah kahhlum a ni ta a ni.

Uttar Pradesh Chief Minister Yogi Adityanath-a chuan jail chhunga inkahhlum thleng chungchang hi chhui chiang turin a ti a, jailor pawh hrem nghal a ni bawk. "Jail chhunga hetiang thleng hi ngaihthah mai tur a ni lo. Uluk takin chhui chian a ni dawn a, mawhphurtute zawng zawng chu hremna na tak pek an ni ang", a ti.

Bajrangi-a nupui, Seema Singh-i chuan ni rei vak lo liamtaah khan a pasal tihhlum tuma vauna a awm niin a sawi. UP CM hnenah pawh hian a pasal chu dawt thua inbeihna siamchawp hmanga tihhlum tuma phiarrukna a awm tih pawh alo hrilh tawh a ni.

Munna Bajrangi hi kum 1967 khan Uttar Pradesh-a Jaunpur district-ah a piang a, a hming dik tak chu Prem Prakash Singh a ni a, a hnuah Munna Bajrangi tih hian a thlak a ni. Kum 2005, November 29 khan Lucknow highway-ah AK47 hmangin Rai-a convoy hi a bei a, Rai leh midang paruk a that a ni.

Uttar Pradesh Police, Special Task Force leh Central Bureau of Investigation chuan BJP hruaitu thihna leh tualthah thubuai dangah Bajrangi hi man tumin an zawng a, a lu manah cheng nuai sarih an phal bawk. Kum 2009, October 29 khan Mumbai-a Malad area-ah Delhi Police team-in Bajrangi hi an man ta a ni. Jail hrang hrangah dah kual a ni. Bajrangi hian kum 20 chhungin mi 40 aia tlem lo a that hman nia sawi a ni.