Party 4-in a ruala inthlan buatsaih duh, party 9 in duh lo

Law Commission-in Lok Sabha leh assemby inthlan a ruala buatsaih chungchanga political party hrang hrangte a kawmnaah party pali chuan a ruala inthlan buatsaih hi ṭha an ti a, party pakua erawhin an duh lo thung. Hetihlai hian rorellai BJP leh eptu party lian ber Congress chu Law Commission-in meeting a buatsaihah hian an tel lo.

Ni hnih awh inkawmna hun buatsaihah hian NDA hnuaia BJP thawhpui Shiromani Akali Dal, AIADMK, the Samajwadi Party leh Telangana Rashtra Samiti te chuan a ruala inthlan buatsaih hi an thlawp thu an sawi. Mahse Trinamool Congress, Aam Aadmi Party, DMK, Telugu Desam Party, CPI, CPI (M), Forward Block leh Janata Dal (Secular) te chuan ṭha an ti lo tih an sawi thung.

SP aiawhtu Ram Gopal Yadav chuan a ruala inthlan buatsaih hi ṭha an tih thu a sawi a, hemi rual hian he ruahmanna hi Lok Sabha term kal mek a tawp hun, kum 2019 ah hman ṭan tura a duh thu a sawi. Hei hi kalpui a nih dawn chuan UP-a BJP sorkar term chu tihtawi a ngai dawn a ni.

Law panel hnena an ngaihdan an thehluhah, Telangana CM K Chandrasekhar Rao chuan inthlan inbuatsaihna atan hian thla tam tak hun hman a nih ṭhin avangin Lok Sabha leh assembly inthlan a ruala buatsaih chu ṭha a tih thu a sawi.

Tamil Nadu-a rorellai, AIADMK chuan a rual a inthlan buatsaih chu ṭha an tih thu an sawi rualin, hman a nih dawn pawhin a hma berah kum 2024 aṭanga hman ṭan chauh ni se a ti. Tamil Nadu assembly term chu hman zawh ngei an duh thu an tarlang.

BJP chuan law panel rawtna hi a thuphungin ṭha a tih thu lo sawi tawh mah se, Commission hnena a ngaihdan dik tak thehlut tur chuan inngaihtuahna hun an la mamawh belh niin a sawi. Congress party pawhin thutlukna a siam hmain eptu party dangte a biakrawn leh phawt tur thu a sawi bawk.