Nawrh huaihawt chhunga loneitu thi chhinchhiahna awm lo : Sorkar laipui

Sorkar laipuiin farm law pathum a siam duh lohna lantira loneituten nawrh an huaihawt chhungin, Delhi border-a nawrh huaihawtnaa tel loneitu thi zat chhinchhiahna, data record a awm lo tih union agriculture miniser Narendra Tomar chuan nimina Parliament-a zawhna a chhannaah a sawi.

Eptuten loneitu thi zat data chungchang leh, sorkar laipui chuan nawrh huaihawt laia thi chhungte zangnadawmna a pe dawn em tih an zawh chu chhangin Tomar chuan, "Ministry of Agriculture chuan he thilah hian record a neih loh avangin hemi chungchang hi sawi lan pawh a ni lo, " tiin Lok Sabha inkhawmah a sawi.

Hetih lai hian eptute leh loneitu pawlte chuan kum khat zet farm law duh lohna lantira nawrh huaihawt chhungin, nawrhnaa tel loneitu 700 chuangin nunna an chan hman niin an sawi. Sorkar lamin thi zat chhinchhiahna engmah a awm lo nia a sawi hi an beih zui hle rin a ni.

Sawisel hlawh tak farm law pathumte hi hun rei tak chhung ram chhunga loneituten an dodal hnuah sorkar laipui chuan sut lehin, Thawhṭanni khan Parliament in hnihah a sutna tur bill-te chu minute reilote chhungin an pass fel nghal a ni. Prime minister Narendra Modi-a'n ram mipuite hmaa ngaihdam a dil aṭanga ni 10 hnuah farm law hi sut an ni leh ta a ni.

Parliament-ah he dan hi hnuhkir ni tawh mah se loneitute chuan sorkar laipui chu an thlai tharte tana minimum support price (MSP) siamsak turin an nawr leh a ni.

Sorkarin MSP panel-ah loneitu pawl aiawh panga dah tum
Sorkar laipuiin farm law pathum a siamte a sut hnuah, loneituten an phut dang, minimun support price (MSP) chungchang ngaihtuahtu tur panel a din turah loneitu pawl hrang hrang intelkhawm, Samyukta Kisan Morcha (SKM) aṭangin mi panga telh a tum. Pawl aiawhte tel turte hming hi a dil a ni.

SKM hruaitu Darshan Pal chuan sorkar lam aṭangin mumal taka sawmna an nghak phawt dawn tih a sawi. Committee din tur hi eng ang tak nge a nih dawn tih pawh an zawtchian thu leh, chhanna an la dawn loh thu sawiin, chhanna an dawn dan azirin December 4-ah meeting an neihah hemi chungchang hi an ngaihtuah dawn tih a sawi.

Agriculture ministry lam chuan he thil chungchangah hian thuchhuah la siam lo mah se, Thawhlehni zan khan ministry chuan loneitu pawl hotu hi telephone-a biain, November 19-a prime minister Narendra Modi-a'n committe din a nih tur thu a lo sawi tawhah an pawl aiawh turte hming hi hriattir turin a ngen a ni.