Kerala sorkarin Covid vaccine la lote a thlawnin enkawl dawn lo

Omicron variant hri leng thar leh vanga mipuite vaccine la tura nawrna kawng khat atan, Kerala sorkar chuan Covid-19 kai damlo, vaccine la la lo te chu hri an kai a nih pawhin a thlawna an enkawl theih tawh dawn loh thu a sawi.

Chief minister Pinarayi Vijayan chuan review meeting zawh hnuah he thu hi sawiin, state chhunga Covid inkaihhruaina zawm lo te chu a thlawna enkawlna pek an ni dawn lo, a ti. "Sorkar chuan vaccine la lo te enkawlna chu a tumsak thei dawn lo. Allergy leh natna dang avanga vaccine la thei lo an nih chuan, an lak theih lohna chhan hi sorkar doctor-in a hriatpuina certificate a pekchhuah an nei ngei tur a ni," a ti.

Sorkar hnathawk leh zirtirtu vaccine la la lo te pawhin doctor certificate an neih a ngai dawn tih CM Vijayan chuan a sawi. Vaccine an lak loh chuan anmahni sensoin kartin RT-PCR test an ti ṭhin tur a ni a, an test report hi thuneitute hnena thehlut ziah tura tih an ni bawk. Hei hi office-a thawk midang leh, school leh college-a zirlaite himna tura an ruahman a nih thu a sawi a ni.

Meeting-ah hian CM chuan Omicron variant thar a awm leh avangin health department pawh invenna lam uluk zawka kalpui leh turin a ti. International passenger-te chu airport-ah uluk taka endik a, sorkarin hri darh tur venna atana kaihhruaina a siamte khauh taka kengkawh turin a ti bawk.

Chief Minister chuan local self-governing body-te pawh anmahni huamchhung ṭheuha vaccine la thei tur chinte'n vaccine an lak vek theihnan hma la turin a ngen. Nimin aṭang khan Kerala sorkar chuan ni 15 chhung awh tur special vaccination drive a neih ṭan a ni.