Court-in August 7 thleng Chidambaram-te pafa hum
Aircel-Maxis thubuai kaihhawihah union minister hlui P Chidambaram leh a fapa Karti Chidambaram-te chu August 7 thleng man theih loh turin Delhi-a Patiala court chuan a hum.
May 30 khan Chidambaram hian he thubuai kaihhnawiha man theih loh tura hum turin court-ah hian a lo thleng tawh a ni. Chidambaram chuan Aircel-Maxis thubuaia finfiahna hrang hrangte chu sorkar laipui kutah a awm vek tawh a, a kut aṭangin engmah hmuh belh tur a awm lo niin a sawi.
CBI leh Enforcement Directorate (ED) in Aircel-Maxis thubuai kaihhnawihah Karti lakah hian thubuai pahnih an lo thehlut tawh a, mahse court chuan ani pawh hi August 7 thleng man theih loh tura humhimna a pe leh a ni.
Karti Chidambaram laka thubuai thehluh hi Aircel-a investment titu, M/S Global Communication Holding Services Ltd hnena Foreign Investment Promotion Board (FIPB) clearance pek chungchang a ni. ED chuan FIBP approval hmuh a nih hnu reiloteah Karti-a nena inzawmna nei, ASCPL hnenah Aircel Televentures Limited chuan cheng nuai 26 a pe niin a sawi. FIPB aprroval hi hetih laia Finance Minister Chidambaram-a pek a ni a, he approval hmuh theihna tur hian Karti hian a pa thuneihna hi a hmang ṭangkai nia sawi a ni.
Aircel-Maxis FDI hnena FIBP approval hi kum 2006, March thla khan Finance minister hian a pe a ni. Hetihlai hian minister hian project proposal-a cheng vabielchhe 600 chin bakah phalna a pe thei lo a, hemi aia tamah chuan Cabinet Committee on Economic Affairs (CCEA) pawmpuina lak a ngai niin ED chuan a sawi. Agency chuan he inremna siam chungchangah FDI approval pek a nih theihnan investment tih zat hi CCEA a thawn a ngaih loh nan dik lo takin cheng vaibelchhe 180 anga tarlan a ni, a ti bawk.
Karti Chidambaram leh P. Chidambaram-a tupa A Palaniappan te company, CMSPL chu Maxis group hnen aṭang hian software hman phalna neih theih US dollar maktaduai 0.5 an dawng nia sawi a ni bawk. Mahse he software hi an zirchiannah India ram chauha hman tura duan niin, Malaysia company tan hmanna tur a awm lo niin agency chuan a sawi.