SC-in boruak bawlhhlawh tihziaawm dan tur ruahmana siam turin sorkar laipui leh Delhi sorkar hrilh

Supreme Court chuan nimin khan sorkar laipui leh Delhi sorkar chu boruak bawlhhlawh tiziaawm tura hma la tur leh, darkar 24 chhunga ruahmanna mumal tak siam turin a hrilh.

Delhi khawpui leh a chhehvel boruak bawlhhlawhin zual lam a pan zel avangin hmalakna awmze tak a awm lo nia an ngaih thu justice DY Chandrachud leh Surya Kant awmna bench chuan a sawi.

Court chuan hun pek chhunga sorkar laipui leh Delhi sorkarte'n ruahmanna an siam thei lo a nih chuan court-in thupek a chhuah mai tur thu a sawi. "Industry leh lirthei aṭanga boruak bawlhhlawh an pekchhuah te hi kan ngaimawh hle. Kan koki aṭangin silai in rawn hmetpuak ngawt thei lo, nangmahni ngeiin ke in pen a ngai a ni," tiin Delhi sorkarin school a hawn chhan a zawt nghal bawk.

Delhi sorkar hian khawpui chhung boruak bawlhhlawh avanga school-te a khar hnuah, Thawhṭanni aṭang khan a hawng leh a ni. Mahse Court chuan puitling zawkte pawh boruak bawlhhlawh vanga in lam aṭanga hna thawk tura tih an la nih lai a, sorkarin naupangte school a kaltir leh mai chu a ngaithiam lo hle a ni.

Supreme Court-in a sawisel hnuah, Delhi environment minister Gopal Rai chuan vawiin aṭangin thupek dang a awm leh hma chu school-te khar leh vek a ni dawn tih a puang. "Air quality a ziaawm chho dawn nia kan ngaih avangin school-te hi kan hawng a, mahse air pollution level hi a rawn san chhoh leh avangin khar an ni leh nghal dawn a ni," a ti. Board exam erawh chu ruahman lawk angin kalpui a ni dawn a, a bak zirna dang chu online mode-a kalpui leh a ni ang.

Delhi khawpuia air quality chu `very poor` category-ah a awm mek tih System of Air Quality and Weather Forecasting And Research (SAFAR) chuan a tarlang. Nimin zinga Delhi-a overall Air Quality Index (AQI) chu 312 nia chhinchhiah a ni.

Air Quality Index (AQI) 0-50 inkar hi `good`, 51-100 `satisfactory`, 101-200 `moderate`, 201-300 `poor`, 301-400 `very poor` leh 401-500 `severe` category-ah ṭhen hran an ni.

SAFAR chuan air quality a chhiat em avangin pawn boruak dawng tam lo tur leh pawn lama chettlatnate pumpelh hram turin mipuite a ngen.