RS MP suspend vangin eptu pawl hruaituten lungawi lohna lantir

Rajya Sabha-a eptu party MP 12-te Parliament Winter Session chhung tel thei lo tura suspend an nih avanga lungawi loin, nimin khan eptu party hrang hrang hruaitute chuan Parliament complex-a Mahatma Gandhi lim bulah lungawi lohna an lantir.

Nimina lungawi lohna lantirnaah hian Congress hruaitu Rahul Gandhi pawh a tel. Rajya Sabha MP 12-te suspend-na chu sut tura an phut thu aupuiin, sorkar chetdan chu an dem tih an sawi.

Heng MP 12-te hi Parliament session neih zawk tak, Monsoon Session-a House chhunga an chet dan mawi lo avangin tun ṭum session-ah tel thei lo tura hrem an ni. Mahse eptu party-te chuan MP-te suspend an nih dan hi dan kalh a nih thu an sawi thung.

Trinamool Congress MP Sougata Roy chuan MP-te hrem an nih chungchangah sorkar chuan heng MP-te hi ngaihdam dil turin a phut a, mahse ram mipuite hnena ngaihdam dil tur zawk chu sorkar hi a ni, a ti.

Rajya Sabha MP hremte hi Congress MP paruk, TMC leh Shiv Sena MP pahnih ve ve bakah, CPM leh CPI MP pakhat ve ve an ni.

Nimina Rajya Sabha rorel inkhawmah pawh MP suspend chungchangah eptu member-ten lungawi lohna lantira a aubuai avangin rorel inkhawm hi ṭum li tihtawp a ni. Eptu member-te hi House laiah chhuak khawmin, MP-te suspend-na chu sut tura phutin an au a ni.