Covid-19 dona kawngah BJP sorkarna state duhsak bikah puh

Shiv Sena party chuan prime minister Narendra Modi kaihhruai NDA sorkar chu ram chhunga Covid-19 hri leng dona kawngah BJP sorkarna state-te duhsak bikah puhin, Covid vaccine peknaah pawh an duhsak bik tih an sawi. Hei bakah sorkarin vaccine dose vaibelchhe 100 pek chhuah a lawm chu a la hun lo tih an sawi bawk.

Nimina Lok Sabha rorel inkhawma Covid-19 hri leng chungchanga debate neihah, Shiv Sena hruaitu Vinayak Raut chuan ram chhunga hri a len aṭanga thla 21 hnu leh, hri leng pawh a ziaawm hnuah sawihona hun buatsaih a ni chauh a ni, a ti.

Khawvel ram hrang hranga Omicron variant darh leh mek avangin sorkar laipui chuan ruahmanna a siam thuai a ṭul a, state sorkar leh sorkar laipuite chuan thawhhona ṭha tak an neih a ngai a ni, tiin a sawi bawk.

Covid-19 vaccine pek chhuah kawngah BJP sorkarna state-te duhsak bik an nih avangin non-BJP sorkarna state-ten an tawrh phah tih Raut chuan a sawi. "Prime Minister hi rampuma mipui vaibelchhe 130 te chunga mawhphurtu a ni. Maharashtra en hran bik tur a ni lo a, Gujarat chu midang aia puih nasat bik tur ni loin, Uttar Pradesh pawh inthlan an hmachhawn dawn vang maiin vaccine pek tam bik an ni tur a ni lo. Mihring cheng zat azirin pek chhuah a ni zawk tur a ni," a ti.

BJP sorkarin India rama Covid vaccine dose vaibelchhe 100 pek chhuah a lawm chu a la hun lo tih sawiin, "Vawiin thlengin ram mipui zingah vaccine dose kima la hi 38% chauh an la ni. Hetah hian ka lungawi mai tur a ni lo," tiin a sawi.