India-ah Omicron variant kai awm tawh ; Hri kai thar 9,219 an awm belh

India ramah Ningani khan coronavirus kai mi 9,216 an awm thar leh a, ramchhunga Covid-19 kai tawh zat chu 3,46,15,757 niin; hri kai mek, active case 99,976 an awm tih Union Health Ministry data chuan nimin khan a tarlang. Hemi ni vek hian Covid hri darh thar leh mek, Omicron kai pawh a ṭum khatna atan India ramah hmuh chhuah an awm.

Ningani khan hripui vanga thi mi 391 an awm belh leh bawk a, heng zinga mi 320 chu Kerala state ami an ni. Ram pumah Covid-19 vanga thi hi 4,70,115 an awm tawh tih data chuan a tarlang bawk. Kerala hian sorkar laipuiin kaihhruaina a siam thar leh, Supreme Court-in a ngen angin an state-a hripui vanga thi zat hi a ennawn vangin Ningani-a thi zat report hi an tam zual ta bik a ni.

Health ministry chuan ram pumah ni 159 chhung chu a zawnin nitina hri kai thar 50,000 hnuailamah a awm tawh tih a sawi. Hri kai tawh zat aṭangin hri kai mek, active case chu 0.29% an ni mek a, March 2020 hnua a hniam ber ṭum niin, ramchhunga Covid-19 kai dama puan chu 98.35% an tling tawh bawk.

Nitina hri kai zat, daily positivity rate chu 0.80% a ni. Ni 60 chhung chu 2% hnuai lamah a awm tawh. Kartina hri kai zat, weekly positivity rate chu 0.84% a ni.Ni 19 chhung 1% hnuailamah a awm tawh tih ministry chuan a sawi.

Omicron variant kai hmu chhuak
India ramah pawh Omicron variant kai mi pahnih hmuh chhuah an ni tawh.

Ningani khan Karnataka state-ah Omicron kaite hi hmuh chhuah an ni. Hri kai zinga pakhat zawk hi South Africa mi, kum 66-a upa thla hmasaa Dubai aṭanga Bengaluru-a thleng leh khawpuia private hospital-a thawk, doctor kum 46 a upa, zinchhuahna nei lote an ni.

An pahnih hian vaccine dose kimin an la tawh a, insawiselna lian tham an nei lo tih official te chuan an sawi. Mahse Omicron kai hmuh chhuah pakhat hi ram pawn lama zin chhuahna nei lo a nih avangin official leh mithiamte chuan Bengaluru mipuite zingah variant thar hi a awm mai hlauhthawnna an nei lian hle a ni.

Union health ministry chuan Omicron variant kai mi pahnihte contact tracing uluk taka neih nghal a nih thu sawiin, primary leh secondary contact-te pawh chhui vek an ni, a ti. Genome surveillance tih turin khualzin rawn lut zinga mi 10 sample thawn a ni tawh bawk.

Karnataka chief minister Basavaraj Bommai chuan coronavirus Omicron variant hri kai thar mi pahnih an hmuhchhuah thar avangin nimin khan expert, senior minister leh official-te nen meeting neiin, hri inkaidarh tur venna atan inkaihhruaina thar an tihchhuah rin a ni.

Omicron kai nia rinhlelh 12 damdawi-inah dah
Karnataka-a Omicron variant kai pahnih hmuhchhuah bakah, New Delhi-a Lok Nayak Jai Prakash Narayan (LNJP) hospital-ah Omicron kai nia rinhlelh mi 12-te dah an ni tawh bawk.

Ningani khan damdawi-inah hian mi pariat dah niin, nimin khan mi dang pali dah belh leh an ni. State thuneitute chuan nimina damdawi-ina dah luh zinga pahnih hi UK aṭanga rawn kal niin, France leh Netherland aṭang rawn kal pakhat ve ve an tel bawk tih an sawi. An pali sample hi genome sequencing tih tura thawn nghal a ni.