Vaccine dose kima la 49% chauh la awm

Sorkar laipuiin November 30 thlenga ram pum huapa vaccine pek chhuah campaign, 'Har Ghak Dastak' a kalpui chhungin vaccine pek zat hi 5.9% in pung mah se, ram pumah Covid-19 vaccine dose kima la chu 49% chauh an la tling.

Ningani thleng khan vaccine hi dose vaibelchhe 125 sem chhuah a ni tawh. Heng zingah hian dose khatna atana pek chhuah hi dose vaibelchhe 79.13 niin, dose khatna hi 84% an ni. Dose hnihna atana sem chhuah hi dose vaibelchhe 45.82 a ni a, a dose kima la zat hi 49% chauh an la ni pha tih ministry of health and family welfare thuchhuah chuan a tarlang.

Kum 18-44 inkar zingah first dose la mi 46,28,14,781 awm tawhin, dose hnihna la mi 23,38,72,325 an awm. Kum 45-59 zingah dose khatna la tawh hi 18,57,50,859 awmin, dose hnihna la hi 12,33,19,876 an awm tawh bawk. Kum 60 chunglam zingah mi 11,63,10,847-in dose khatna an la a, dose kima la mi 8,06,10,843 an awm.

Healthcare worker zingah 1,03,84,113 leh frontline worker zingah 1,83,79,693-ten vaccine dose khatna an la tawh a, dose hnihna la hi healthcare worker 95,21,499 leh frontline worker 1,65,40,678 an awm tawh a ni.

Sorkar laipui chuan state/UT-te hnenah vaccine hi dose vaibelchhe 138 pek chhuah a ni tawh tih a sawi a, heng zingah hian dose vaibelchhe 22.05 chuang chu hman lohin an la awm a ni.