Uttarakhand-ah ruahsur nasa vangin mi pasarih thi

Uttarakhand state-ah ruahsur nasain chhiatna a thlen vangin mi pasarih an thi a, school te khar vek a ni.

Ni hnih kalta chhung khan Uttarakhand-a hian ruah nasa takin a asur a, lui te a lian nasain lei eng emaw zat tuilian hian a lenchhe tawh a ni. Ni thum chhung ruah a la sur chhunzawm dawn nia sawi a nih vangin venthawna thilah school te pawh khar tir an ni.

Ruahsur nasain chhiatna a thlen vanga thi zinga pali hi Dehradun-a Seema Dawar-a in chimin a delh an ni a, mi pathumte hi Dalanwala, Sahaspur leh Balliwala-a tuilianin a hnawlte an ni.

Leiminin highway ṭhenkhat a hnawh bawk a, National Highway-94 pawh kaltlang theih lohin a awm mek. Kawngpui thenfai hna hi thawh nghal a ni a, kawngpui pawh a tlang leh thuai beisei a ni.

Uttarakhand Chief Minister Trivendra Singh Rawat chuan ruahsur nasa avanga harsatna an tawh mek avangin officer te leave leh holiday pawh a cancel vek. Officer-te chu an post-ah ṭheuh awm a, harsatna tawkte puia che chhuak thei tura inring reng turin hriattir an ni bawk.

Kum 2013 khan Uttarakhand hian ruahsur nasa vangin tuilian leh leimin nasa tak a lo tuar tawh a, mi 5,478 thiin mi sang telin an in leh lo an chan bawk. Hei bakah hian leimin leh tuilianin lei a hnawl avangin biakzina kal mi sing tel chu an tangkhang phah tawh bawk a ni.