AP CM-in 'Anna Canteen' hawng

Arunachal Pradesh Chief Minister N Chandrababu Naidu chuan mi retheite hnena man tlawm zawka chaw hralh chhuah theihna tur 'Anna Canteen' a hawng.

State sorkar hian municipality 110-ah Anna Canteen 203 hawn a tum a ni. Heng canteen aṭang hian mi naran te hnenah tukṭhuan, chawchhun leh zanriahte Rs 5 chauhin hralh chhuah a ni ang. An eitur hralh chhuahah hian tukṭhuan/breakfast-ah 3 idlis/ 3 pooris/ upma/ pongal; chawchhun/lunch leh zanriah/dinner-ah plate khatah rice, dal/sambar, pickle, curry leh curd te telh a ni.

State pumah Anna Canteen 203 siam tum niin,a thawh khatna atan hian municipality 25-ah 60 hawn a ni. A thawh hnihna hi August thla hian kalpui leh niin, hmun 86-ah canteen 143 hawn a ni ang.

Telugu Desam Party (TDP) founder Nandamuri Taraka Rama Rao (NTR) chuan miretheite hnena buhfai kg khat Rs 2-a hralhna tur scheme a lo siam tawh a, hemi hnua party president leh Chief Minister Naidu chuan he scheme hi a siam ve leh a ni. He scheme hnuaiah hian mi retheite chuan ni khatah tukṭhuan, chaw chhun leh zanriahte chu Rs 15 in an lei thei dawn ta niin Minister for Municipal Administration & Urban Development, P. Narayana chuan a sawi.

Andhra Pradesh sorkar chuan he canteen enkawl hna hi Akshaya Patra Foundation kuta a dah a, mi nuai hnih chuangin ei tur man tlawm zawk leh hrisel zawk an lei thei dawn a ni. NTR canteen kalpui danah rawtna leh sawisel tur neite tan pawh IVRS system siam a ni bawk.