Covid-19 kai enkawl dam zat an pung zel

Ram pumah hripui kai enkawl dam zat an pung zel a, nimin thleng khan mi 1,69,798 chu enkawl dam tawh niin enkawl dam rate pawh 51.07% a tling tawh a ni. 

Health and Family Welfare Ministry report tihchhuah aṭanga a lan dan chuan darkar 24 chhungin mi 7,419 enkawl dam an ni a, ni eng emaw zat chhung chu hri kai mek aiin enkawl dam zat hi an tam tawh zawk a ni.

Khawvela hri lengin a nghawng nasat ram palina ni mek India-ah hian report thar berah chuan coronavirus kai hmuh chhuah thar  11,502 an awm a, nimin piah lam aiin nimin report-ah hian hri kai hi an tlem hret a ni.

Ram pumah hri kai mi 3,32,424 an awm tling tawh a, enkawl dam 1,69,798 an awm tawh bawk avangin hri kai mek 1,53,106 an awm. Thihpui 9,520 an awm tawh a, mi 325-in nimin report-ah hian an thihpui ve leh bawk.

Maharashtra chu India state zinga hrileng hluarna ber a nih chhunzawm zel a, kai hmuh chhuah thar 3,390 awm lehin mi 1,07,958-in an kai tawh a ni. 

Enkawl dam pawh an pung ve zel a, mi 50,978 chu enkawl dam tawhin darkar 24 chhungin mi 1,632 an enkawl dam a, hrikai mek 53,030 an awm a ni. He tih lai hian thihpui 120 awm belh lehin mi 3,950-in an thihpui tawh. 

India rama hri kai tam ber dawttu state Tamil Nadu-ah chuan hri kai 44,661 awm tawhin enkawl dam 24,547 an awm tawh a, mi 435-in an thihpui tawh bawk. 

Hetihlai hian Delhi-ah chuan mi 41,182-in hri leng an kai tawh a, hmuh chhuah thar 2,224 lai awmin Tamil Nadu aiin darkar 24 chhunga hmuhchhuah thar hi an tam zawk a ni.

Delhi-ah hian hri leng hi a zual nasa hle a, enlawl dam pawh hi hrikai mek aiin an tlem hle zawk a, hri kai mek 24,032 an awm laiin enkawl dam zat chu 15,823 chiah a la ni. Mi 1,327-in an thihpui tawh bawk.

Indian Council of Medical Research (ICMR) chuan darkar 24 chhungin sample 1,14,519 an test thei tawh a, hri len ṭan tir aṭanga nimin thleng khan sample 57,74,133 an test tawh.

Laboratory pawmpui pawh an neih belh zel a, nimin thleng khan laboratory 901 chu Covid-19 test-na atan hian pawm tawhin a ṭum khatna atan laboratory 900 an pawmpui tling a ni. Heng zinga 653 chu sorkar laboratory a nih laiin 248 chu private laboratory a ni thung.