Delhi-ah Omicron variant kai hmuchhuak thar ; India ramah Omicron kai 5 hmuchhuak tawh

Delhi health minister Satyendar Jain chuan nimin khan Delhi-ah Omicron variant kai an hmuhchhuah thu sawiin, hei hi Delhi-a Covid variant thar kai hmuhchhuah hmasak ber a ni.

Minister Jain chuan, "Delhi-a Omicron kai hmasa ber hmuhchhuah hi Tanzania aṭanga lo let niin LNJP Hospital-ah dahluh a ni," tiin a sawi.

December 3 aṭang khan Omicron variant hmuh tawhna ram, "at risk" ram aṭanga Delhi-a lut zinga mi 12-te chu hrikai nia an rinhlelh avangin LNJP-ah hian dah luh an ni tawh. Heng zinga pariat chuan coronavirus kaiin symptom an nei tih hmuhchhuah a ni tawh a ni.

Delhi-a omicron variant kai hmuh chhuah thar nen hian India ramah Covid-19 Omicron variant kai mi panga hmuh chhuah an ni tawh.

Kar liamta Inrinni khan Omicron kai mi pahnih, kum 72-a upa Gujarat-a NRI leh kum 33 mi Maharashtra mite chu hmuhchhuah an lo ni tawh bawk. An pahnih hian Zimbabwe leh South Africa aṭanga rawn let an ni.

India rama Omicron kai hmuh chhuah hmasak berte chu kar liam ta Ningani khan Karnataka-ah hmuh chhuah a ni. Kum 66 mi, South Africa aṭanga rawn kal leh kum 46 mi, Bengaluru doctor zinchhuahna nei lo niin, an pahnih hian vaccine dose kima la ve ve tawh an ni.

Hri kai thar 8,895 leh thihpui 2,796 awm belh
Inrinni liam ta khan ram chhungah hri kai mi 8,895 awm belh lehin, hemi ni hian Covid-19 vanga thi chhinchhiah mi 2,796 an awm.

Union health ministry chuan Bihar state-a hripui vanga thi data siamṭhat chu telh a ni a, hei bakah Kerala-in hri vanga thi mi 236 a lo la chhinchhiah tel lohte chu Inrinni report-ah hian dah tel an nih avangin thi zat report hi an tam niin a sawi. India ramah Covid-19 vanga thi hi mi 4,73,326 an awm tawh a ni.

Ram hrang hrangah hri kai an pung chho leh mek leh, Omicron variant vanga an buai mek karah India ramah chuan hri kai, active case chuan tlakhniam lam a pan zel. Active case hi 99,155 ni mekin, kum 2020 March thla hnua an tlem ber ṭum a ni a, hri kai tawh aṭangin 0.29% an ni.