Puitling 50% chuangin Covid vaccine dose kimin la tawh : Union Health Minister

India rama puitling Covid-19 vaccine la thei chin zinga 50% chuangte'n dose kimin an la tawh tih union health minister Mansukh Mandaviya chuan nimin khan a sawi a, ramchhungah vaccine dose vaibelchhe 127.61 chuang semchhuah a ni tawh tih a sawi bawk.

Union Health Ministry official tarlan danin, puitling zinga 84.8% chuangin dose khatna an la tawh a ni.

"Vaccine la thei chin zinga 50% chuangin dose kimin an la tawh a ni. Kan thawhho phawt chuan Covid-19 nena kan inbeihnaah hian hnehna kan chang thei dawn a ni," tiin Mandaviya chuan a sawi.

Ram pumah vaccine hi session 1,32,44,514 kaltlangin semchhuah a ni tawh.

India ramah Covid vaccine semchhuah hi January 16 khan kalpui ṭanin, a thawh khatnaah health care workers (HCWs) te pek an ni a, Front line workers (FLWs) tan February 2 khan semchhuah ṭan a ni bawk.

March 1 aṭangin kum 60 chin chunglam leh kum 45 chin, natna benvawn neite hnenah vaccine hi semchhuah leh a ni. April 1 aṭangin kum 45 chin chunglamte tan semchhuah a ni.

Sorkar laipui chuan chak zawka hma la zelin, May 1 aṭangin ram pumah kum 18 leh a chunglam tan vaccine semchhuah hna an kalpui leh a ni.