Rajasthan CM-in state dangte ṭanpui inhuam

Rajasthan chief minister Ashok Gehlot chuan an state ṭhenawm hnai, Uttar Pradesh, Madhya Pradesh, Punjab, Haryana, Gujarat leh Delhi-te chu Covid-19 testna kawngah puih an inhuam thu a sawi. 

Gehlot chuan an state ṭhenawmte hian an mamawh a nih chuan ni khata mi 5,000 test thlenga an ṭanpui theih thu a sawi a, an state-ah chuan ni khatah hri kai mi 15,000 chuang an test theih thu a sawi bawk. "Tunah chuan kan state chuan midangte kan ṭanpui thei tawh a ni," tiin Gehlot chuan an state-in hma an sawn dan a sawilang. 

Rajasthan-ah hian hri kai hmuh chhuah hi mi 12,694 an tling tawh a, heng zinga mi 9,566 chu enkawl dam ni tawhin, he hri vanga thi hi mi 292 an awm tawh a ni. Enkawl mek hi mi 2,836 an awm. 

Hri kai enkawl hi la tam hle mah se, test an neih chak theih avangin hma an sawn thu Gehlot chuan sawiin, test tam a nih avang hian hri darh tur pawh an thunun theih ṭan thu a sawi. Hri leng venna kawnga sorkarin dan zawm tur a siam zawm lo te, hmaikhawr vuah lo leh inhlata awm (social distancing) zawm lote chu na taka hrem an nih tur thu Gehlot chuan a sawi bawk. 

Rajasthan-ah hian June 21-30 chhungin Covid-19 chungchanga special campaign neih tum a ni a, he hunah hian hri chungchang hi mipuite hnenah a inven dan tur, uluk zawka inenkawlna nei tur leh thil ṭul dangte chu mipuite hnena hrilh hriat tum a ni.