Amit Shah hoin all-party meet nei

Union home minister Amit Shah hoin nimin khan Natianal Capital Region-a coronavirus leng mek chungchang sawihoin all party meeting neih a ni. 

Meeting-ah hian Delhi Lieutenant Governor bakah Aam Aadmi Party, Congress, BJP,  Bahujan Samaj Party(BSP) leh Samajwadi party (SP) aiawhte an tel. Pathianni khan Amit Shah chuan Delhi chief minister Arvind Kejriwal chu meeting a lo neihpui tawh bawk a ni.

Delhi khawpuiah hri kai an pung chak hle a, hri leng dona kawngah Delhi sorkar chu sorkar laipui chuan theihtawpin a pui zel dawn tih home minister chuan a sawi. Khawpui chhunga ni khata coronavirus test neih theih zat pawh reilotah 18,000 chin a ni thuai dawn tih Shah chuan a sawi a ni.  

Congress party chuan khawpuia chengte a duh apiang tan Covid-19 test theih vek tura ruahman tur leh, he hri kai emaw, containment zone-a awm emaw te chu chhungkaw khatah Rs 10,000 zel pe turin an phut bawk. Medical student, fourth year zirlaite chu damdawi lam thawktu indaih loh avangin non-permanent resident doctor-a hman an rawt bawk.

Delhi sorkarin a hmaa thu a lo chhuah tawh, Delhi-a nursing home awmte chu Covid-19 kaite enkawlna tur atan hman tura a tih chu Delhi Medical Association lamin an duh loh thu an tarlan hnuah Pathianni khan sut leh a ni. 

Khawpui chhunga hri kai an pun chak avang leh, a enkawlna tur hmun indaih lohna a awm chhoh tak avangin Delhi huam chhunga nursing home,  khum 10-49 nei pha chhinte chu Covid-19 kaite mutna tur atana ni thum chhunga siam hman turin Delhi sorkar chuan nursing home-te a hriattir a ni. Mahse Delhi Medical Association chuan Covid-19 kai kher lo damlo dangte enkawlna turah indaih lohna awm theih vang leh harsatna a awm theih thu sawiin chief minister Arvind Kejriwal hnenah lehkha an thawn a, hemi hnu hian Delhi sorkar chuan an thuchhuah  hi a sut leh a ni.