Supreme Court-in Delhi khawpui bawlhhlawh chungchangah LG dem

Supreme Court chuan Delhi khawpui chhunga bawlhhlawh tam tak inchhekkhawl chungchangah Delhi Lieutenant Governor Anil Baijal chu a khak a, hemi chungchangah hian Delhi CM chu mawhphurtuah puh theih a ni lo, a ti.

Court chuan LG hian khawpui chhung bal intiangkhawm te chu thenfai tir turin thuneihna a nei a, mahse he thuneihna hi a hmang lo a ni, a ti. "LG hian khawpui tifai tura a thuneihna neihte hi a hmang lo. Hriattirna eng zat nge a tihchhuah tawh a, heng bawhhhlawhte tihfai tir tur hian eng chen nge hun a hman dawn?" tiin a zawt let nghal bawk.

SC chuan hemi chungchanga hian LG chuan Chief Minister Arvind Kejriwal-a chu a dem thei lo ang tih sawiin, " He thilah hian CM hi hnukluh ve tur a ni lo, a chhan chu LG hian thuneihna a nei tih a sawi a ni" tiin Additional Solicitor General Pinky Anand chu a hrilh a ni. LG office chuan municipal corporation chungah thuneihna a nei a, mahse hetichung hian khawpui chhunga bawlhhhlawh thenfai chungchang chu a ngaihsak tawk lo a ni, a ti.

Ni hnih kalta khan Supreme Court chuan Mumbai khawpui chu ruahsur nasa vanga tui chima a awm laiin, Delhi chu bawlhhlawhin a chim buai thung niin a sawi. Hetiang a thleng mek chung hian sorkar chuan engmah a ti lo a, court a inrawlh chuan sawisel leh beih an tawk leh nghal a, an inrawlhna chin thliar thiam turte a beihzui an nih fo si niin a sawi.

Court hian ramchhung hmun hrang hrangah bawlhhlawh sawngbawl tura ruahmanan an siam dante a lo zawt tawh. State 13 leh Union Territory-te chuan bawlhhlawh sawngbawl dan turah policy mumal an la siam loh avangin court pawh hi a lungawi lo hle. Hriattir an ni hnuah pawh affidavit an la thehluh loh vangin Bihar, Chhattisgarh, Goa, Himachal Pradesh, Jammu and Kashmir, West Bengal, Kerala, Karnataka, Meghalaya, Punjab, Lakshadweep, leh Puducherry te chu cheng nuai khat ṭheuh a chawitir a ni.