Visa fel loh vangin British MP thawn kir

India rama rawn zin tum, British MP Lord Alexander Carlile chu a visa a fel tawk loh vangin Nilaini khan Delhi airport aṭangin thawn kir leh nghal a ni.

Bangladesh Prime Minister hlui leh Bangladesh Nationalist Party (BNP) hruaitu, jail-a tang mek Khaleda Zia-i legal consultant Lord Carlile hi Ziai-i dik lo taka puh a nih chungchanga media mite kawm turin India ramah hian rawn zin a tum a ni. Mahse Foreign Ministry thupuangtu Raveesh Kumar chuan a rawn kalna chhan tur nia a visa-a a tarlan leh a thiltih tum hi a inmil lo niin a sawi a, hei vang hian India rama a luh hi an phalsak ta lo niin a sawi.

Lord Carlile hian Bangladesh Prime Minister Sheikh Hasina-i kaihhruai sorkarin an rama luh a phalsak loh vangin India ramah hian press conference nei tura kal tum a nih thu a sawi. Khaleda Zia-i puh a nih chungchanga thil nih dan dik tak chu international media hnenah hrilhfiah a duh niin a sawi. Lord Carlile hi kumin March thla khan BNP hruaitu legal team atan hian ruat hian a ni.

Bangladesh PM hlui Khaleda Zia-i lakah hian criminal case 30 chuang zet siamsak a ni a, heng an puhna hrang hrang hi a party BNP chuan thu dik lo nia sawiin, sorkarin politics khel thei lo tura a siam tumna hmanrua mai niin an sawi. February thla khan a thubuai pakhatah chuan thiam loh chantir niin kum nga tang tura hrem a ni. He thubuai hi pime minister a nih lai, kum 2001-2006 inkara fahrah enkawltu pawl a dinin rampawn lam aṭanga ṭanpuina a dawn, dollar 253,000 tichingpena puhna chungchang a ni.