Kum 66 hnuah a kut tin a tan

Pune-a cheng, Shridhar Chillal chuan kum 66 zet a kut veilam tin a zuah hnuah nimin khan tan ta. Chilla hi Guiness World Record-ah khawvela kuttin sei ber record siam lai a ni.

Kum 14 anih lai, kum 1952 aṭangin chilla hian a kut veilam tinte hi a zuah a, tunah hian kum 82 mi a ni tawh a ni. A kuttin ho seizawng hi belhkhawmin cm 909.6 an tling tawh a, nimin khan New York-a Times Square-ah a kut tin tanna hun hi hman a ni. A kut tin zingah a zungpui tin chu sei berin cm 197.8 a sei a ni a, a zunglai tin cm 186.6, zungchal tin chu cm 164.6, a zung u tin cm 181.6 leh zungte tin cm 179.1 a sei an ni. A tin tan takte hi New York-a Times Square-a Ripley's Believe It or Not! ah dah an ni ang.